Pas afro dhjetë muajsh në krye të institucionit, Besmir Beja largohet nga detyra e drejtorit të Përgjithshëm të Doganave, ndërsa në këtë post pritet të emërohet Fation Shehu, një emër me përvojë disa vjeçare në luftën kundër kontrabandës dhe krimit të organizuar.
Drejtimi i Drejtorisë së Përgjithshme të Doganave pritet t’i besohet Fation Shehut, pas propozimit zyrtar për emërimin e tij, i cili do të shqyrtohet në mbledhjen e Këshillit të Ministrave.
Shehu vjen në këtë përgjegjësi të rëndësishme institucionale me një përvojë të konsiderueshme profesionale, veçanërisht në fushën e luftës kundër kontrabandës. Për katër vjet ka ushtruar detyrën e drejtorit të Antikontrabandës, ku është angazhuar në luftën kundër veprimtarive të paligjshme, krimit të organizuar dhe shkeljeve doganore.
Një nga vlerësimet më të rëndësishme për punën e tij ishte Çmimi i Parë i ndarë vitin e kaluar nga SELEC (Qendra për Zbatimin e Ligjit në Evropën Juglindore), për arritjet në luftën kundër kontrabandës dhe krimit të organizuar. Ky çmim përbën një vlerësim ndërkombëtar për angazhimin dhe rezultatet e arritura në këtë fushë.
Përveç përvojës në institucionet doganore, Fation Shehu ka ndjekur edhe trajnime të ndryshme pranë organizatave ndërkombëtare, duke zgjeruar njohuritë dhe përgatitjen profesionale në fushën e sigurisë, zbatimit të ligjit dhe bashkëpunimit ndërinstitucional.
Emërimi i tij në krye të Doganave pritet të zyrtarizohet të premten nga Këshilli i Ministrave. Me marrjen e kësaj detyre, Shehu do të përballet me sfidën e drejtimit të një prej institucioneve më të rëndësishme për administrimin e të ardhurave shtetërore, mbrojtjen e tregut dhe luftën kundër ekonomisë informale.
Ndryshimi në drejtimin e Doganave shënon një kapitull të ri për institucionin, ndërsa vëmendja do të jetë te rezultatet konkrete që drejtuesi i ri do të arrijë në forcimin e kontrollit doganor, rritjen e efikasitetit dhe luftën kundër kontrabandës, transmeton euronewsal.












































