Ish-kryetari i Kuvendit të Kosovës, Jakup Krasniqi, ka përfunduar vizitën treditore në shtëpinë e tij në Kosovë, ku pati mundësinë të qëndrojë pranë familjes pas një periudhe të gjatë larg saj.
Pas disa orësh të kaluara me familjarët, Krasniqi është larguar nga shtëpia nën përcjelljen e zyrtarëve të EULEX-it, duke përmbyllur kështu ditën e tretë dhe të fundit të qëndrimit të lejuar në vendlindje.
Momenti i largimit është përcjellë me emocione. Vëllai i tij është parë duke e shoqëruar deri në çastet e fundit, në një ndarje të ngarkuar emocionalisht, që dëshmon mallin dhe lidhjen e fortë familjare.
Krasniqit i ishte dhënë leje nga Dhomat e Specializuara të Kosovës në Hagë për të qëndruar tri ditë në Kosovë, me qëllim të vizitës dhe takimit me familjen. Kështu, pas tri ditësh pranë njerëzve të tij më të afërt, ish-kryetari i Kuvendit është larguar sërish, nën mbikëqyrjen e autoriteteve përkatëse./BS













































