Santiago Bernabeu apo Grand Stade Hassan II? Gara për të pritur finalen e Kupës së Botës 2030 po shndërrohet në një betejë të fortë mes Spanjës dhe Marokut, ku përtej futbollit po luajnë rol edhe diplomacia, lobimet dhe interesat brenda FIFA-s.
Finalja e Kampionatit Botëror të Futbollit 2030 po kthehet në një nga çështjet më të diskutuara mes vendeve organizatore të turneut. Edhe pse Spanja, Portugalia dhe Maroku do ta organizojnë së bashku këtë ngjarje madhështore, gara për të siguruar ndeshjen më të rëndësishme të kompeticionit ka nxitur rivalitet të dukshëm, veçanërisht mes Madridit dhe Rabatit. Botërori i vitit 2030 do të ketë një karakter historik, pasi do të shënojë 100-vjetorin e zhvillimit të Kampionatit të parë Botëror. Për këtë arsye, FIFA ka parashikuar një organizim të veçantë, me tri ndeshje përkujtimore në Uruguai, Argjentinë dhe Paraguai, ndërsa pjesa kryesore e turneut do të zhvillohet në Spanjë, Portugali dhe Marok. Megjithatë, vëmendja tashmë është përqendruar te pyetja se cili shtet do të ketë privilegjin të presë finalen e madhe.
Spanja pretendon finalen, me Bernabeun në qendër të projektit
Sipas raportimeve të mediave iberike, Spanja ka fituar terren në këtë garë dhe stadiumi legjendar Santiago Bernabeu në Madrid po shihet si një prej kandidatëve kryesorë për të pritur finalen. Impianti i Real Madridit, i modernizuar me investime të mëdha dhe me infrastrukturë të nivelit më të lartë, përfaqëson një argument të fuqishëm në favor të kandidaturës spanjolle. Mbështetja e UEFA-s konsiderohet gjithashtu një faktor me rëndësi në këtë proces. Por përballë Spanjës qëndron Maroku, i cili ka ambicie të mëdha për të organizuar finalen në një stadium që synon të bëhet simbol i futbollit botëror.
Maroku nuk heq dorë nga ambicia e madhe
Projekti maroken mbështetet te ndërtimi i Grand Stade Hassan II, në afërsi të Casablancës. Stadiumi parashikohet të ketë kapacitet rreth 115 mijë spektatorë dhe synon të bëhet një ndër impiantet më të mëdha të futbollit në botë. Për Marokun, organizimi i finales do të ishte shumë më tepër sesa një sukses sportiv. Do të përfaqësonte një afirmim ndërkombëtar, një fitore diplomatike dhe një dëshmi të ambicies së vendit për t’u pozicionuar mes qendrave më të rëndësishme të futbollit global. Ndërkohë, në prapaskenë janë përmendur edhe lobime dhe interesa politike që lidhen me mbështetjen për presidentin e FIFA-s, Gianni Infantino. Sipas raportimeve, premtimi për finalen marokene është lidhur me përpjekjet për të siguruar përkrahjen e federatës marokene dhe të strukturave afrikane të futbollit.
Infantino përballë presionit dhe interesave të mëdha
Çështja e finales është shndërruar edhe në një pikë tensioni mes FIFA-s dhe UEFA-s. Në këtë përplasje nuk bëhet fjalë vetëm për një stadium apo për një qytet organizator, por edhe për ndikimin dhe balancat e pushtetit në futbollin ndërkombëtar. Gianni Infantino, i cili synon të vazhdojë drejtimin e FIFA-s, përballet me një klimë të ndërlikuar, ku interesat e federatave, konfederatave dhe vendeve organizatore ndërthuren me ambiciet për të ardhmen e futbollit botëror. Në këtë kontekst, edhe organizimi i Kongresit të FIFA-s në Rabat merr një rëndësi të veçantë diplomatike dhe simbolike. Në fund, Botërori 2030 pritet të jetë një festë e madhe e futbollit, por gara për finalen dëshmon se prapa spektaklit sportiv zhvillohet një konkurrencë e fortë për prestigj, ndikim dhe fuqi ndërkombëtare.
Bernabeu apo Grand Stade Hassan II?
Përgjigjja përfundimtare mbetet në duart e FIFA-s. Por një gjë është e qartë: Spanja dhe Maroku nuk po garojnë vetëm për të pritur 90 minutat më të rëndësishme të turneut, por edhe për të fituar një vend në historinë e futbollit botëror, transmeton abcnewsaal.












































