Sot në Prishtinë do të zhvillohet ceremonia e inaugurimit të Presidentes së Republikës së Kosovës, Justina Shiroka-Pula. Ceremonia zyrtare do të mbahet në oborrin e Presidencës dhe do të nisë në orën 15:00.
Pas zgjedhjes së saj nga Kuvendi i Kosovës, Justina Shiroka-Pula sot do ta marrë zyrtarisht detyrën e Presidentes së Republikës së Kosovës, në një ceremoni ku pritet të marrin pjesë përfaqësues të institucioneve të vendit, mysafirë të ftuar dhe personalitete të ndryshme të jetës publike. Sipas agjendës mediale të Presidencës, ceremonia do të zhvillohet në oborrin e institucionit presidencial, ndërsa mediat janë të ftuara ta përcjellin nga afër këtë ngjarje. Shiroka-Pula u zgjodh presidente e Kosovës në seancën e jashtëzakonshme të Kuvendit, ku në votim morën pjesë 84 deputetë. Ajo mori 81 vota, ndërsa kandidatja tjetër, Eliza Hoxha, mori një votë. Dy deputetë abstenuan.
Presidentja e re vjen në këtë detyrë me një karrierë të gjatë akademike dhe institucionale. Ajo është ekonomiste, profesoreshë universitare dhe akademike, ndërsa deri në zgjedhjen në krye të shtetit ka ushtruar detyrën e kryetares së Akademisë së Shkencave dhe të Arteve të Kosovës.
Shiroka-Pula ka shërbyer edhe si ministre e Energjisë dhe Minierave, ndërsa gjatë karrierës së saj ka mbajtur një sërë pozitash akademike dhe publike.
Ceremonia e sotme shënon fillimin zyrtar të mandatit të saj si Presidente e Republikës së Kosovës dhe pritet të jetë një nga ngjarjet kryesore institucionale të ditës. Ceremonia e inaugurimit nis në orën 15:00 në oborrin e Presidencës së Kosovës.









































